Kryetari i Bashkisë e vlerëson me titullin “Mirënjohje e qytetit të Vlorës”
Në një ambient shumë miqësor, por edhe intelektual njëherësh, organizuar si një Mbrëmje Gala, Prof.Dr. Arta Musaraj, një nga intelektualet e njohura të qytetit të Vlorës, aktualisht anëtare e Këshillit Bashkiak Vlorë, ka ndarë vlerësimin që asaj i është bërë nga një prej universiteteve prestigjiozë europian, duke i shtuar rrethit intelektual,

por edhe qytetit të Vlorës edhe një vlerë tjetër, atë të zhvillimit intelektual të shoqërisë së sotme me hapat dhe ritmin e Europës .
Komiteti Sokrates, i Akademisë së Oksfordit, Asambleja e Çështjeve të Europës, ndër 50 kandidaturat më të përzgjedhura sipas kritereve të përcaktuara, përzgjodhi Prof.Dr. Arta Musaraj si një nga pesë shkencëtarët më të spikatur të fushës se menaxhimit dhe komunikimit per vitin 2012, duke i akorduar çmimin “Një emër në Shkencë 2012”, rezultat ky i arritur pas mbi 15 vjet pune akademike universitare. Aktualisht Prof.Dr.Musaraj është Drejtore e Bordit Editorial të Academicus - International Scientific Journal, e vetmja revistë shkencore në fushat social ekonomike dhe ligjore në gjuhën angleze në Shqipëri, pjesë e librarisë shkencore elektronike më të madhe në bote Ebsco Publishing ne data base-n "Academic Search Complete".
“The Name in Science” Award, shoqërohej me këtë motivacion:
Komiteti Sokrates, Akademia EBA Oxford (Britani e Madhe): Mbajtës i Titullit të Nderit “Një emër në Shkencë” 2012, Arta Musaraj, Republika e Shqipërisë: Me vendim të Komitetit Sokrates, në përputhje me Paragrafin 1 e 2 të Rregullores së Akademisë, emri i Arta Musaraj është rregjistruar në Regjistrin Botëror të shkencëtarëve të shquar të shekullit të 21, duke e vlerësuar me medaljen e mirënjohjes “Për Kontribute në Botën e Shkencës” si kavaliere e Urdhërit Sokrates

Duke vlerësuar arritjet shkencore, intelektuale e akademike të zonjës Musaraj, Kryetari i Bashkisë Vlorë z. Shpëtim Gjika e nderoi atë me titullin “Mirënjohje e qytetit të Vlorës”. Ka qenë z.Arben Beqiraj, Nënkryetar i Bashkisë, i cili ia dorëzoi këtë titull znj.Musaraj, titull i shoqëruar me motivacionin: Për kontribut të shquar në vite në fushën e arsimit universitar në Vlorë, për edukimin shkencor e profesional të shumë brezave të të rinjve studentë dhe rritjen e kapaciteteve intelektuale; Si shenjë vlerësimi dhe simbol i figurës qytetare në përkushtimin për të bërë të njohur Vlorën dhe vlerat e saj historike, kulturore e njerëzore në debate shkencore e tryeza ndërkombëtare.