Nën kujdesin e bashkisë Vlorë, në teatrin “Petro Marko” është zhvilluar pasditen e së enjtes ceremonia e dorëzimit të titullit “Qytetar Nderi i Vlorës” z Spiro Jovani.Ish drejtuesi i shkollës së mesme të përgjithshme “Ali Demi”

është nderuar me titullin e lartë me motivacionin: ”Për kontribut të shquar në edukimin qytetar, pedagogjik dhe atdhetar të brezave të rinj si pedagog, drejtues i arsimit në rrethin e Vlorës dhe drejtues i shkollës së mesme të përgjithshme”Ali Demi” të qytetit të Vlorës. Në ceremoninë e zhvilluar me këtë rast merrnin pjesë intelektualë në qytet, deputetë, anëtarë të këshillit bashkiak, ish nxënës e mësues të shkollës “Ali Demi”, ndërsa ka qenë i pranishëm edhe kryetari i Bashkisë Vlorë, z Shpëtim Gjika.
Një dokumentar i përgatitur nga TV Amantia ka njohur me jetën dhe veprimtarinë e ish drejtuesit “legjendë”, të shkollës së mesme të përgjithshme “Ali Demi”, ndërsa më pas të pranishëm në takim kanë sjellë kujtime e episode nga 25 vjetët e drejtimit të tij në arsim. Ata thanë se duke nderuar z Spiro, është nderuar gjithë shkolla “Ali Demi”. Në kujtimet e tyre, z.Spiro Jovani është sjellë si njeriu që krijoi modelin e drejtuesit, e si njeriu aktiv që gjithçka e kishte ndërtuar mbi bazën e bashkëpunimit. Si iniciator i propozimit për dhënien e titullit, “Qytetar Nderi i Vlorës”, deputeti socialist Eltar Deda, njëkohësisht edhe ish nxënës i shkollës “Ali Demi”, vlerësoi meritat e Z.Jovani në edukimin e brezit të ri, ruajtjen e personalitetit të nxënësve, si dhe marrëdhënien e shkëlqyer që ish drejtuesi kishte vendosur me kolektivin mësues-nxënës të kësaj shkolle.
Dorëzimi i titullit “Qytetar Nderi i Vlorës” z.Spiro Jovani i është bërë nga Kryetari i Bashkisë Vlorë z.Shpëtim Gjika. Kryebashkiaku tha se, pavarësisht ku jemi shkolluar, e kemi vlerësuar gjimnazin “Ali Demi” si një emblemë të arsimit në Vlorë. Ish gjenerata të kësaj shkolle sot janë të angazhuar në jetën politike, ekonomike e sociale shqiptare, ndërsa numëron brenda saj edhe deputetë. Kryetari i Bashkisë së Vlorës, z Shpëtim Gjika përgëzoi grupin nismëtar për nderimin e ish drejtuesit të njohur të “Ali Demit”, si dhe ka falenderuar Këshillin e Bashkisë që e miratoi këtë titull.
“Vlora është dhe do të mbetet jeta ime”, tha ndër të tjera z.Spiro Jovani, teksa ka falenderuar për dhënien e titullit të lartë “Qytetar Nderi i Vlorës”. Gjatë gjithë veprimtarisë së tij z.Spiro Jovani, i është dedikuar arsimit në Vlorë. Ai ka nisur kontributin e tij në fushën e mësimdhënies në vitin 1959 si mësues historie në shkollën Pedagogjike “Jani Minga” në Vlorë e më pas në struktura drejtuese të arsimit në rreth e disa shkollave të qytetit. Për 25 vjet rresht pa ndërprerje ai ka qenë drejtor i shkollës së mesme të përgjithshme “Ali Demi”. Së bashku me kolektivin e mësuesve, ka nxjerrë gjenerata të tëra nxënësisht me një përgatitje të thellë shkencore, të cilët punojnë sot me devotshmëri, duke i bërë emër shkollës së tyre. Për një pune shembullore e një drejtim pedagogjik, shkencor e mjaft të kualifikuar, si dhe për ndihmën e pakursyer në zhvillimin dhe gjallërimin e aktiviteteve shkencore, kulturore e artistike, është dekoruar me Urdhërin “Naim Frashëri” të Klasit të Tretë në 1967, Urdhërin “Naim Frashëri” të Klasit të Parë në vitin 1976 dhe me titullin e lartë “Mësues i Merituar” në vitin 1980